မောင်ဒေါရဲ့ အတွေးစည်ပိုင်း
လှလှကြွကြွ ကစမ
မောင်ဒေါရေးလိုက်သည့် “ကစမ”ကိုမြင်သည်နှင့်
အခြားအခြားဆင်တူယိုးမှားစကားလုံး စကားတွဲတွေနှင့် မမှားစေလိုပါ။ ဒါကတော့ ဘာကိုတီးတော့မည်ပဲ
ဟူ၍လည်း အထင်တော်တလွဲတွေ မတွေးစေချင်ပါ။ မောင်ဒေါပြောလိုသည့် “ကစမ”မှာ “ကံစမ်းမဲ” အကြောင်းသာဖြစ်ပါ၏။
ဗမာစကားသည် တလုံးချင်း အဓိပ္ပါယ်ဆောင်သော
ဧက၀ဏ္ဏာဘာသာစကားဖြစ်သည်ဟု မောင်ဒေါကြားဖူး၏။ ကံစမ်းမဲ ဆိုသည်မှာ “ကံ” (ကန်နှင့် အသံထွက်တူ)ထဲကို
ဆင်းစမ်းလျှင် မဲမဲသဲသဲရွှံ့တွေသာရမည်ဟူ၍လည်း အဓိပ္ပါယ်ဖော်နိုင်မည်ဟု မောင်ဒေါ ၏မမှီ့တမှီ
ဇကောဇက အသိကလေးတွေနှင့်လည်းတွေးမိပါ၏။ စည်ပိုင်းလည်း နည်းနည်းလှုပ်သွားပါ၏။ ထားတော့
ဤကားနိဒါန်း တည်း။
မောင်ဒေါကား မုဒိတာတရားကို စပါယ်ရှယ်လေ့ကျင့်နေသူဖြစ်ရကား၊
မစားရ၀ခမန်းတွေကို မြင်ရကြားရလျှင် ထိုးထိုး ထိပ်ထိပ် ရင်ခုန်လာသည်အထိ ၀မ်းမြောက်ကျေနပ်ပီတိပွားမိပါ၏။
ကံစမ်းမဲပေါက်ပြီး ဘယ်သူတော့ ဘာကြီးရသွားသတဲ့ဆိုလျှင် မိမိအိပ်မက်ထဲထိထည့်မက်ပြီးရွှင်လန်းစွာတက်ကြွသွားမိပါ၏။တဆက်ထဲမှာပင်ထိုကံစမ်းမဲကြောင့်စိတ်ဓါတ်ပိုင်းတွင်
“လောင်းကစားစိတ်” လွှမ်းလာ သူတွေအတွက်လည်း မရဲတရဲကလေး စဉ်းစားမိပါ၏။
ပစ္စည်းသေးသေးလေးတွေ ရောင်းပြီး ကံစမ်းမဲအကြီးကြီး
ပေးနိုင်ကြကုန်သော ၀ါဏိဇ္ဇာကုန်သည်ကြီးများကိုလဲ ပစ္စလက္ခတ် ကြည်ညိုမိပါ၏။ မာဂျောင်းဖဲဝိုင်းနှင့်
ကက်စီနိုဂျောက်ဂျက်စက်များထဲမှ တူးဖော်ထုတ်ယူထားခဲ့ကြသည့် မိရိုးဖလာဘောဂဗေဒ အတွေး အခေါ်များကိုလည်း
၎င်းတို့၏ ပျံပွားနိုင်မှုအတွက် မျက်လုံးဝိုင်း လောက်အောင်လေးစားမိပါ၏။
တဆက်ထဲမှာပင် ဘာလေးညာလေးရောင်းပြီး ထမင်းရှာစားရကောင်းမည်လား
စဉ်းစားတိုင်း မောင်ဒေါ၏ စည်ပိုင်းအတွင်း “ကစမ”သည် ကူးခတ်ရောက်ရှိလာခဲ့ပချေ၏။
“သူခေါင်းထဲမှာလဲ သပြေညို၊ ငါ့ခေါင်းထဲမှာလဲ
သပြေညို” ဆိုသလိုပဲ၊ သူကလဲကံစမ်းမဲပေး၊ ငါကလဲကံစမ်းမဲပေးဆိုတော့ ချမ်းသာတဲ့ လူတွေလည်း
ချမ်းသာကုန်ကြ၏။ မောင်ဒေါမုဒိတာ အပြင်းစားတွေ၊ မုဒိတာဟဲဗီးတွေ ပွားပေးပါ၏။ ဟဲဟဲ……နောက်တော့
မောင်ဒေါလဲရောဂါ တစ်ခုတက်လာပါ၏။ ချမ်းသာချင်လာတဲ့ ရောဂါပေါ့ခင်ဗျာ။ ချမ်းသာချင်ဗိုင်းရပ်စ်တွေ
မောင်ဒေါဆီကူးစက်ခဲ့သည် ဆိုသော်ရအံ့ပါ။
မောင်ဒေါက ဆယ်ပြားရင်းပြီး ဆယ်သိန်းဖြစ်ချင်တာလေ၊
“ကြွက်သေတစ်ခု အရင်းပြု”ဆိုသလိုပေါ့၊ သည်တော့ သေးသေး ရင်းပြီး ဧရာမကြီးမြတ်မဲ့ အကြံဉာဏ်တွေကို
စည်ပိုင်းထဲက ကလော်ထုတ်ပါ၏။ သေချာတာကတော့ ၀ါဏ္ဏိာဇ္ဇာဂုရုကြီးတွေရဲ့ နေအေး လက်သစ် ကံစမ်းမဲနည်းကိုလဲ
မလွဲမသွေသစ္စာရှိစွာ စဉ်းစားပါ၏။
ဟုတ်ကဲ့……. အော်တိုငုတ်တုတ်အကြံဉာဏ်တွေ
ထွက်လာပါ၏။ ထိုအကြံဉာဏ်များကား ဆွန်ဇူး၏နိဿရများနှင့်၎င်း၊ ဟားဗတ်ကက်ဆန်၏၀ါဏိဇ္ဇာများနည်းဗျူဟာများနှင့်၎င်း၊ဒေးကာနက်ဂျီ၏လူပေါ်လူဇော်လုပ် မိတ္တဗလဋီကာဆိုတာကြီးနှင့်သော်၎င်း အနည်း ငယ်မျှသာ ပတ်သက်စေလျက်
ကမ္ဘာကျော်မုသားဝါဒီကြီး အဒေါ့ဖ်ဟစ်တလာ၏ အပေါက်တော်ထွက် စကားဖြစ်သည့် “လိမ်သာလိမ်၊ များများလိမ်၊
ကြီးကြီးကျယ်ကျယ်လိမ်၊ လိမ်ဖန်များလာရင်၊ ကိုယ့်ဖာသာတောင် ယုံလာလိမ့်မယ်”ဟူသော ၀စနတ္ထလင်္ကာရကို
လုံးဝ အခြေစိုက်ပါ၏။ လုံးဝသာမက၊ ပြားဝပါအခြေစိုက်ပါ၏။ သည်လိုပါ။
လက်မွန်မဆွ - ပထမတွင်မောင်ဒေါ ပရိုက်ဗိတ်ကုမ္ပဏီထောင်ပါ၏။
လွယ်ပါ့ဗျာ။ မတည်ရင်းနှီးလည်ပတ်ငွေ တစ်ထရီလီယံ။ တကယ်တော့ မောင်ဒေါမှာ ပိုက်ဆံ (၁)သောင်းတောင်ပြည့်အောင်မရှိ။
ဒါပေသိ - ရတယ်လေ၊ ရင်းနှီးမည့်ငွေက ကိုယ်ပိုင်ဖြစ်ဖို့မှ မလိုပဲ။ သူကြီးဘုရား၊ ရွာသားကောင်းမှုလုပ်လို့ရသော
ဟစ်တလာရိုက်နည်းတွေ၊ နေအေးလက်သစ်နည်းတွေ မောင်ဒေါမှာရှိပြီးသားကပဲ။ ကုမ္ပဏီမှတ်ပုံတင်ရုံးကလဲ
ပိုက်ဆံပြခိုင်းတာမှမဟုတ်တာ။ လုပ်မယ့်အလုပ်တွေကလဲ အစုံပဲ။ ဘာမှမရှောင် ပိုက်ဆံရလျှင်
အကုန် လုပ်မည်။ ရာနှုန်းများများမြတ်လေ အဆင်ပြေလေပဲပေါ့။
မောင်ဒေါနှင့် ဖက်စပ်လုပ်နိုင်မည့် နောက်ဖေးပေါက်က
အာချောင်နိုင်ငံခြားသား င၀ါ၊ ငမဲတွေကလည်း မောင်ဒေါအကွက်ဖြစ်၏။ သူတို့ တရားဝင်မလုပ်နိုင်သည့်
အလုပ်တွေကို မောင်ဒေါကတရားဝင်စက္ကူပေါ် ရောက်အောင် အပေါက်ပေါင်းစုံ ၀င်ပြီးလုပ်၏။ အားပါး
- အဆင်ပြေမှပြေ။ အဟောက်အဟမ်း၊ ငေါက်အငန်းသန်လှသူများဟူ၍၎င်း နာမည်ကြီးသည့် အကြီးကြီးတချို့ကိုလဲ
မောင်ဒေါ ပါးစပ် ပိတ်လိုက်နိုင်ပါ၏။ လွယ်ပါသည်။ ဟနေသော ပါးစပ်ထဲကို ပါးစပ်အပြည့်ထောင်းသွပ်ပေးလိုက်မှတော့
ပါးစပ်ပိတ်သွားပြီပေါ့။ မဆန်းရေး တချောင်းငင်မဆန်း၊ အဟမ်း…..ဟမ်း၊ မောင်ဒေါ ကုမ္ပဏီထွားကြိုင်းလာခဲ့ပြီ
ဟုပင် ခပ်တိုတိုဆိုကြပါစို့ရဲ့။
မောင်ဒေါ၏ “ဒေါအင်တာနေရှင်နယ်ထရေးဒင်း
ပရိုက်ဗိတ်ကုမ္ပဏီလီမီတက် (ဟိုးလဒင်း)တွင် ပြီစီးဒင့်ရာထူး၊ မန်နေဂျင်းရာထူး၊ စီအီးအိုရာထူးတို့သည်
မောင်ဒေါကသာ ကျနော်ချည်းဇာတ်လိုက်ဖြစ်ပြီး - ဘီအိုဒီ (ဒါရိုက်တာဘုတ်အဖွဲ့)၀င်တွေအဖြစ်
စီးပွားရေး ဆိုသည်ကို ပုံဆွဲအရုပ်ပြရသော မောင်ဒေါ၏ကတော်လေဒီဂျမ်းဒေါ (ခေါ်) မဒမ်ဂျမ်းဒေါ
(ခေါ်) သီရီမဟာ ဒါတင်စရီ ရှောက်ကျင်းတန်နှင့် မောင်ဒေါ၏ (၂) ၀မ်းကွဲတောပြန်တောင်ပြန်ကြီး
ဂရိတ်မောင်တုတ်တို့အား ရွေးချယ်ထားလိုက်ပါ၏။
ပြီးတော့ထရေးဒင်းဆိုသည့်အတွက် ဘာတွေထရေးဒင်းလုပ်မည်ဟု
ကြံဆရာတွင် ကန့်ကွက်သူမရှိ၊ အတည်ပြုလိုက်သည်ကား “ရေ”ဖြစ်ပါ၏။ ရေတောင်မှ အလာကားရသည့်ရေ။
ဖရီးရသည့်ရေ။ “ရေ”ကို ရေအတိုင်းရောင်းသည်က ရိုးဟိုးဟိုးနေပြီ။ ဒီမှာ “ရေ”ကို ဗဲလျူးအက်ဒက်
(တန်ဖိုးမြှင့်တာကို ပြောတာပါ………မျက်ခုံးရှုံ့မသွားပါနဲ့အုံး) လုပ်ပြီးရောင်းမည်၊ “ရေ”ကို
အရောင်နည်းနည်းကလေး ထည့်ပါမည်။ အစိမ်းလဲ့လဲ့ကလေးနှင့် ပန်းရောင်လဲ့လဲ့ကလေး၊ ပန်းနုရောင်နှင့်
အစိမ်းနုရောင်ရေ ပင်နီစလင်တပုလင်းကိုကျပ် တစ်သောင်းဖြစ်မည်။ ဘယ်သူဝယ်ပါ့မလဲ၊ အထင်မစမောပါနှင့်၊
လွယ်ပါ၏။ “ယောက်ျားလေးဖွားစေသည့်ရေစင်၊ မိန်းကလေးဖွားစေသည့် ရေစင်။” ယောက်ျားလေးအတွက်
ပန်းနုရောင်၊ မိန်းကလေးအတွက် အစိမ်းနုရောင်၊ ကလေးမရနိုင်ကြသည့်၊ ယောက်ျားလေးပဲ လိုချင်သည့်၊
မိန်းကလေးပဲလိုချင်သည့် အန္ဓလူသားတွေ ၀ယ်ကြပါလိမ့်မည်။ သောက်ပြီးထင်တိုင်း မပေါက်လျှင်လည်း
ရှောင်စရာ တွေအပြည့်။ ရှောင်နည်းတွေကတော့ “တောစီးကလက်”ပေါ့ဗျာ။
နောက်တဆင့် တက်မည်၊ ကိုယ်ဝန်ရှိစထဲက တောက်လျှောက်သောက်ရမည်၊
ပျက်ကွက်၍မရ၊ ပြီးတော့လဲလာပြီ - ကစမ -ပုလင်းတစ်ထောင်ကို ကူပွန်တစ်ခုပေးမည်၊ ကူပွန်တွေကို
လတလတွင် မဲနှိုက်ပြီး ဆုပေးမည်။ ပထမဆု “ဖရဲရေး” ကား (၁၀)စီး၊ ဒုတိယဆု -ဟာလေဒေဗစ်ဆန်ဆိုင်ကယ်
အစီး (၂၀)၊ တတိယဆု ဆိုနီကထုတ်သည့် အီလက်ထရောနစ်ပစ္စည်းအတွဲ (၃)တွဲ။ (တကယ် ပေးရန် ဘယ်လိုမှမရည်ရွယ်)
မောင်ဒေါမှ မချမ်းသာလျှင် မည်သည့်သကောင့်သား
ချမ်းသာအံ့နည်း။ ၁၀၀ လောက်ရင်းလျှင် (၁)သောင်းလောက်ရမည် မှန်းနေကြသော ခရိုနီစီးပွားရေးသမားတွေလောက်ကတော့
မောင်ဒေါတို့က ပျင်းတောင်ပျင်းသေး၊ သင်တန်းပေးမဟေ့ လာကြဟုပင် ခေါ်လိုက်ချင်ပါသေး…..။
အဟိ
ဗညားဂျမ်းဒေါ (ကွမ်းခြံကုန်း)
No comments:
Post a Comment